Hvað breytist þegar heilbrigðisgögn fara að flæða?

Í áratugi hefur heilbrigðiskerfið þróast í kringum stofnanir og kerfi. Sjúkraskrár hafa verið skráðar, geymdar og stjórnað af þeim stöðum þar sem þjónustan er veitt. Þó að sjúkraskrár hafi verið færðar úr pappír yfir í rafrænt form á síðustu 30 árum hefur grunnuppbyggingin lítið breyst, stafræni skjalaskápurinn hefur einfaldlega tekið við af þeim pappírsbundna.   

Nú er þó að hefjast nýtt tímabil í meðferð heilbrigðisgagna. Með tilkomu European Health Data Space (EHDS) er verið að setja reglur sem gera ráð fyrir að heilbrigðisgögn fylgi einstaklingum, flæði milli kerfa og jafnvel milli landa.   

Þessi breyting snýst ekki aðeins um tæknilega innviði eða reglugerðir. Hún mun hafa bein áhrif á daglegt starf lækna og heilbrigðisstarfsfólks. 

Sjúklingar fá aukið aðgengi að eigin gögnum 

Í dag geta læknar yfirleitt nálgast upplýsingar um sjúklinga á nokkrum sekúndum. Sjúklingurinn sjálfur hefur hins vegar oft takmarkað aðgengi að sínum eigin gögnum. Með nýjum reglum mun það breytast.   

Í auknum mæli munu sjúklingar geta: 

• Lesið það sem skráð er um þá í sjúkraskrá 

• Óskað eftir leiðréttingum 

• Takmarkað aðgang að ákveðnum gögnum

Þetta þýðir að læknar þurfa að gera ráð fyrir því að sjúklingar lesi það sem skráð er í sjúkraskrá. Skráning verður því ekki aðeins klínískt verkfæri heldur einnig samskiptamiðill við sjúklinginn. 

Gögn munu berast frá fleiri stöðum 

Önnur breyting er að læknar geta nálgast gögn um sjúklinga sem hafa verið skráð annars staðar. Jafnvel í öðrum löndum.   

Til dæmis gætu læknar fengið aðgang að: 

• Samantekt um sjúkling 

• Rafrænum lyfjaseðlum 

• Lyfjaafgreiðslum 

• Myndgreiningum og myndgreiningarskýrslum 

• Rannsóknarniðurstöðum úr rannsóknarstofum 

• Útskriftarskýrslum 

Þetta getur aukið yfirsýn og bætt ákvörðunartöku, sérstaklega þegar sjúklingar hafa fengið þjónustu á fleiri en einum stað. Á sama tíma kallar þetta á nýjar venjur. Gögn munu koma úr mismunandi kerfum, á mismunandi tungumálum og með mismunandi skráningarhefðir. 

Til að þetta gangi upp í framkvæmd þarf að auðvelda sjúklingum að nálgast og skilja eigin gögn en þar eru lausnir eins og Silva hjá Helix dæmi um slíkan stuðning.