Nýtt í Sögu: Bætt yfirsýn og flýtiskráning styttir skráningartíma

Ýmsar aðrar breytingar má einnig nefna eins og skráningu keisaraaðgerða auk endurbóta í Mæðraskrá, Afgreiðslu og Lyfjavísi. Síðast en ekki síst eru að koma frá okkur fyrsta útgáfa valinna eyðublaða í vef með tengingu við Tal í texta virkni auk nýrrar útfærslu á flýtiskráningu í sjúkraskrá.

Meiri sjálfvirkni og flýtival í eyðublöðum

Við höfum verið að bæta við virkni í eyðublöðin í Sögu sem flýta fyrir skráningu, meðal annars með sniðmátum (mallar) sem hægt er að vista og kalla upp á einfaldan hátt og flýtiskráningarvirkni sem bætir aðgerðum, greiningum og flýtitexta sjálfkrafa inn í viðkomandi kóðasvæði. Hér má finna demo myndbönd sem sýna hvernig breytingarnar líta út í Sögu.

Sniðmát eyðublaða

• Sniðmát með upplýsingum um samskipti og útfylltum eyðublöðum. Hægt er að kalla fram nafn eða kennitölu sjúklings í texta þannig að það sé sótt sjálfkrafa fyrir valinn sjúkling þegar sniðmát er notað til búa til samskipti.

• Blöðin skila sér eins og þau eru vistuð, þ.e. með textum, kóðum og öðru sem er til staðar. Hægt er að fylla áfram í þau eftir að sniðmátið er notað, þ.e. bæta við texta eða kóðum sem eiga við sjúkling.

Flýtiskráning

• Úr textasvæði í eyðublaði er hægt að kalla inn aðgerðaglugga til að velja greiningar, flýtitexta, aðgerðir og fleira. Þegar kóði er valinn fyllist sjálfkrafa inn í viðkomandi kóðasvæði og textinn kemur í svæðið sem unnið er úr. Í sumum tilfellum væri því hægt að skrá blað með því að vinna alfarið úr einu og sama svæðinu. 

• Hægt er að hreinsa textann sem kemur úr textasvæðinu ef fólk vill ekki hafa hann, valið situr áfram eftir í kóðuðu reitunum.

• Sjálfgefið er að nýjasta val notanda komi í flýtivalmöguleikum þannig að fyrir sérfræðinga sem nota mikið sömu kóða þá verða þeir aðgengilegri.

Tal í texta

• Öll lengri textasvæði í öllum blöðum geta stutt tal í texta ef það er virkjað hjá stofnun. Notandi getur tekið upp eins margar upptökur og þörf er á. Upptökur eru aðgengilegar áfram eftir staðfestingu blaðs.

Sjúklingur speglaður 

• Þegar sjúklingur er valinn í Sögu uppfærist valinn sjúklingur líka í eyðublöðum og til baka yfir í Sögu ef breytt er þar. Notandi getur þá haft vefinn opinn til hliðar við Sögu og unnið samhliða án þess að þurfa að uppfæra sjúkling í báðum lausnum.

Meira öryggi og árangur í lyfjameðferð með Lyfjavísi

Lyfjavísir er valkvæð virkni við Sögu sem gerir heilbrigðisstarfsfólki mögulegt að fá upplýsingar um milliverkanir lyfja með fljótlegum hætti og stuðlar þannig að meira öryggi og árangri í lyfjameðferð. Algengi fjöllyfjanotkunar jókst um nærri 38% á árunum 2010 – 2020 (10 tbl. Læknablaðsins 2023) og nýtt hugtak „ofurfjöllyfjameðferð“ (hyperpolypharmacy) er farin að skjóta upp kollinum í umræðunni.

Lyfjavísir sparar læknum tíma við lyfjayfirferð og greiningu vandamála

Mikil aukning í lyfjanotkun gerir læknum erfitt að greina möguleg vandamál tengd fjöllyfjameðferð en þar hjálpar Lyfjavísir til. Með tilkomu Miðlæga lyfjakortsins eru komnar ábyggilegar upplýsingar um raunverulega lyfjanotkun sjúklinga sem hjálpar læknum að framkvæma milliverkunarleit telji þeir ástæðu til áður en nýju lyfi er ávísað. Lyfjavísir er aðgengilegur innan úr Sögu og sækir upplýsingar lyf sjúklings í miðlægu lyfjakorti og framkvæmir strax milliverkunarleit byggða á gögnum úr norska lyfjagrunninum FEST (Forskrivnings- og ekspedisjonsstøtte). Lyfjavísir getur þannig sparað læknum tíma við lyfjayfirferð og greiningu vandamála hjá sjúklingum sem nota mörg lyf.