Öruggara lyfjaferli með Lyfjavaka

Í heimi þar sem lítil mistök geta haft stórar afleiðingar er mikið öryggi fólgið í því að hafa fyrirmæli eins skýr og kostur er á og rekjanleg til þeirra sem bæði gáfu þau og fylgdu þeim eftir.

Lyfjavaki er rafrænt skráningarkerfi á lyfjagjöfum skjólstæðinga heilbrigðisstofnana. Það er tengt við Sögu sjúkraskrá og sækir lyfjafyrirmælin beint í eMed lyfjafyrirmælakerfið. Í Lyfjavaka skráir starfsmaður tiltekt á lyfium ásamt lyfjagjöfinni og þar birtist yfirlit yfir allar lyfjagjafir á tiltekinni deild. Þannig er sýnilegt í kerfinu hvaða fyrirmælum hefur verið framfylgt og hver þeirra á eftir að afgreiða. Þetta auðveldar yfirsýn yfir hjúkrun og ummönnun fyrir alla sem koma að velferð skjólstæðinga.

Hjúkrunarfræðingur að störfum

Lokað lyfjaferli frá ávísun til lyfjagjafar

Í gegnum eMed eru lyfjafyrirmæli læknis gefin og lyfjarúllur pantaðar í gegnum apótek. Í framhaldinu tekur Lyfjavaki við þar sem lyfjagjafirnar eru staðfestar. Þannig fæst lokað og öruggt lyfjaferli frá því að lyfi er ávísað þar til skjólstæðingur fær það, allt skráð beint í sjúkraskrá skjólstæðings í Sögu. Lyfjavaki er einnig í formi smáforrits sem gerir það að verkum að starfsfólk getur skráð afstöðu lyfjagjafar og upplýsingarnar eru aðgengilegar í rauntíma.

Öruggt, gagnsætt og rekjanlegt

Lyfjamistök eru meðal algengustu mistaka í heilbrigðisþjónustu og öryggi sjúklinga getur verið í húfi. Það er því mikilvægt að nota allar bjargir sem í boði eru til að lágmarka líkur á mistökum.